Теори материалӗсем
Ятсăр троллейбус
Троллейбус калаçма пултарать-и? Кулăшла ыйту. "Паллах, çук!," – тейĕç хăшĕсем."Ятсăр троллейбус" калавра акă троллейбус калаçать. Хăй тĕллĕн, анчах калаçать. Калав авторĕ калаçтарать ăна. Калаçтарма сăлтавĕ пысăк – обществăлла транспорта хисеплеменни, çырса, варалса, чĕркелесе хуни, ларкăчĕсене касса, çурса хăварни. Çак киревсĕрлĕх урăх ан пултăрччĕ çакă пулать те ĕнтĕ калавăн тĕп теми. Хайлавăн тĕп шухăшне троллейбус монологĕнче тупатпăр „Лайăх ĕç ман, кирлĕ ĕç, ...эпĕ çынсем хушшинче пурăнатăп“. Чĕрĕ тата чĕре мар персонажсем (Витя,троллебус) урлă çыравçă пире халăха сăтăр тăвакан тата ырă ĕç тăвакансене уçса парать. Калаври ĕç-пулăмра троллейбусăн номерĕ çук, апла пулсан вăл, пирĕн çулсем çинче чупакан пур автобус-машина-троллейбусăн пĕтĕмлетнĕ сăнарĕ. Литература сăнарĕ кунта троллейбус – ĕç тăвакан тĕп сăнар. Çыравçă троллейбус ĕçне сăнласа панă май хула илемне кăтартать. Каçхи хула пек илемлĕ иккен троллейбус тăвакан ĕç. „Мĕн-мĕн кăна курмасть вăл кунĕпе. Халĕ пĕр сехет хушшинче мĕн кăна тÿсмерĕ те...“ автор вулакана ÿкĕте кĕртес, ĕнентерес тĕллевпе калать, çак меле ăслав тесе калатпăр. Любовь Мартьянова хăйĕн çĕнĕ шухăшне сăнласа, ăсласа, каласа парать. |