Пĕр-пĕринпе хутшăннă чух калаçăва пуçлама, ăна тытса пыма, вĕçлеме пĕлни пĕлтерĕшлĕ. Çынсен пуплевĕн йĕркине пуплев этикечĕ теççĕ.  

     Çураçуллă хутшăнма çынсем сăпайлăх сăмахĕсемпе усă кураççĕ.  Чăваш чĕлхинче кун пек сăмахсем нумай. Вĕсем çынсен пурнăçĕн тĕрлĕ енĕпе çыхăннă: сывлăх сунни, сыв пуллашни, чĕнни, йăлăнни, кăмăллă калани, каçару ыйтни, паллашни, саламлани.

      Тĕл пулсан çынсем пĕр-пĕрне сывлăх сунаççĕ. Çапла майпа вĕсем пĕр-пĕрне кăмăлланине, калаçас туртăм пулнине кăтартаççĕ.  Сывлăх суннă чухне кампа калаçнине, лару-тăрăва, талăк вăхăтне шута илмелле.