Пĕтĕмлетÿ сăмахĕсем тесе пĕлтерĕшĕ енчен пĕр йышши членсене пĕтĕмлетекен сăмахсене калаççĕ.

Пĕтĕмлетÿ сăмахĕсем:

• пĕр йышши членсемпе пĕрешкел ыйтура тăраççĕ;
• пĕр йышши членсемпе пĕрешкел член пулаççĕ;
• пĕлтерĕшĕ пĕр йышши членсеннинчен анлăрах пулать;
• пĕр йышши членсем умĕн те, хыççăн та тăма пултараççĕ;
• ытларах чухне местоименисемпе наречисенчен пулаççĕ.

Пĕтĕмлетÿ сăмахĕсем пĕр йышши членсем умĕнче чухне пĕтĕмлетÿ сăмахĕсем хыççăн икĕ пăнчă лартаççĕ: Пурте пĕр: вырăс та, тутар та, чăваш та.

Пĕтĕмлетÿ сăмахĕсем пĕр йышши членсем хыçĕнче чухне пĕтĕмлетÿ сăмахĕсем умĕн тире лартаççĕ: Вырăс та, тутар та, чăваш та – пурте пĕр.

Пĕтĕмлетÿ сăмахĕсем пĕр йышши членсем умĕн тăнă чух предложени вĕçленмест пулсан пĕр йышши членсем умĕн икĕ пăнчă, хыççăн  тире лартаççĕ: Пурте: вырăс та, тутар та, чăваш та – пĕр.