Чăваш чĕлхинче тулли мар пĕлтерĕшлĕ япала ячĕсем шутне ай, аяк, ăш(ĕ), варă, вĕç, пуç, çи, çум, тăрă, ум, хыç  сăмахсем кĕреççĕ. Вĕсем урăх япала ячĕ хыççăн тăрса вăхăта е вырăна кăтартса параççĕ. Тĕслĕхрен, Кĕнекене сĕтел çине хутăм предложенири çине япала ячĕ кĕнекене ăçта хунине  кăтартать (хыçне е айне мар).

Тулли мар япала ячĕсем пăхăнакан сăмахсемпе пĕрле вĕçленеççĕ, ытларах чух пару, вырăн тата туху падежĕсен аффиксĕсене йышăнаççĕ: кĕпер çумне, кĕпер çумĕнче, кĕпер çумĕнчен.

Вăхăт, хушă, çул, самант, сехет, кун йышши япала ячĕсем тулли пĕлтерĕшпе те, тулли мар пĕлтерĕшпе те çÿреме пултараççĕ: Вăхăт çитмесĕр тырра кĕлете кĕртеймĕн. – Спектакль пынă вăхăтра ачасем шăпăрт ларчĕç.