Предложенири ытти сăмахсене пăхăнман кам? мĕн? камсем? мĕнсем? ыйтусенче тăракан тĕп члена подлежащи теççĕ.

Подлежащи сказуемăй ĕçне кам тунине е сказуемăйра кăтартнă паллă камăн е мĕнĕн пулнине кăтартать. Ытларах чухне тĕп падежри япала ячĕпе местоименирен пулать: Йăмăкăм Салампи ятлă. Вăл 5-мĕш класра вĕренет. Подлежащи вырăнĕнче ытти сăмахсем те пулма пултараççĕ: Вăйли çĕнтерет. Саккăрмĕшсем ăмăртура мала тухрĕç. Юрлакансем сцена çинчен анчĕç. Чĕвĕл-чĕвĕл такама та килĕшет. Аякрах мар „Урра!“ илтĕнчĕ.