Деепричастисем глагол тĕпĕ çумне -са(-се), -сан(-сен), -сассăн(-сессĕн), -а(-е), аффикссем хушăнса пулаççĕ: юрласа, итлесе, юрласан, итлесен, юрла-юрла, итле-итле.

Хăш-пĕр деепричасти формисем танлаштаруллă степень аффиксне йышăнма пултараççĕ. Ун пек формăсем шутне -са(-се), -а(-е) аффикслă деепричастисем кĕреççĕ: каçăрăлсарах çÿрет, куларах пăхать.

-са(-се), -сан(-сен), -сассăн(-сессĕн) аффикслă деепричастисем çуклă формăра пулма пултараççĕ. Çуклă форма аффиксĕ -ма(ме) яланах глагол тĕпĕ çумне хушăнать, ун хыççăн – деепричасти аффиксĕ: выля-ма-сăр, ĕçле-ме-сен, вĕрен-ме-сессĕн.

Çуклă формăра аффикс -са(-се) мар, -сăр(-сĕр) пулать.

Деепричастин çуклă формине В.И. Сергеев тĕпчевçĕ хăйĕн („Чăваш чĕлхин морфологи категорийĕсем. Таблицăсемпе меслет кăтартăвĕсем. Шупашкар, 1994. 36 с.) кĕнекинче инфинитивăн çуклăх категорийĕ тесе калани те пур.